Matatagpuan sa gitnang bahagi ng Oita Prefecture, ang Beppu ay isa sa pangunahing lugar panturismo ng bansang Hapon dahil sa marami at dekalidad na onsen (hot springs) na matatagpuan at nagmumula rito. Matatagpuan sa loob ng lungsod ng Beppu ang walong natatanging onseng pampaliguan na kilala bilang "Beppu Hatto". Binubuo ito ng Beppu onsen, Hamawaki onsen, Kamegawa onsen, Kannawa onsen, Kankaiji onsen, Horita onsen, Shibaseki onsen, at Myoban onsen. Ang Beppu onsen, bilang sentro ng Beppu Hatto, ay natatangi dahil ito ay binubuo ng mga panturismong pasilidad tulad ng Takegawara onsen at ng Beppu Tower. Ang Takegawara onsen ay mayroong marangyang bubong na hango sa istilo ng Karahafu. Samantala, ang Beppu Tower ang pangatlong tore ng radyo sa bansang Hapon.

◎ Onsen

Nangunguna ang Beppu pagdating sa dami at kalidad ng onsen sa buong bansang Hapon. Bawat minuto, 87,616 litro ng mainit na tubig ang lumalabas sa mga bukal ng Beppu at ang dami ng bilang nito ay sinasabing puma-pangalawa sa buong mundo. Bukod pa rito, sa talaan ng 11 klase ng hot spring na nakasaad sa batas pang-onsen ng lungsod ng Beppu, tanging ang radyoaktibong klase lamang ng onsen ang hindi matatagpuan sa Beppu.

◎ Kasaysayan

Ang Beppu ay mayroong mahabang kasaysayan na nakatala sa Topograpiya ng Bungo at Topograpiya ng Probinsya ng Iyo mulang pa noong panahon ng Nara. Nang magbukas ang ruta patungong Beppu mula sa Osaka noong 1873, unti-unting dumami ang mga bumibisita sa Beppu hanggang sa naging tanyag na destinasyon ito pagdating sa turismo ng onsen.

◎ Klima at Topograpiya

Matatagpuan sa isla ng Kyushu, at nakaharap sa panloob na dagat ng Seto, ang Beppu ay mayroong katamtaman at kaaya-ayang klima, at madalang na pag-ganap ng natural na kalamidad. Napapalibutan ng bulubundukin at dagat, mamamalas sa dahilig na anyo ng Beppu ang magandang tanawin mula sa mga natural na usok ng mga onsen nito.

◎ Kaganapan

Bilang pasasalamat sa biyaya ng natural na ganda ng mga onsen sa Beppu, maraming masasayang kaganapan sa Beppu. Natatampok na tema ang "Beppu Hatto Onsen Matsuri (Kapistahan ng Beppu Hatto Onsen)" at "Onsenchi de Genki de Kirei (Pagpapasigla at pagpapa-ganda sa rehiyon ng onsen)" sa mga iba't ibang programa tulad ng eksibisyon na tinatawag na "Beppu Hatto Onsen Hakurankai (Onpaku)," at ang pagkuha ng sertipikasyon bilang eksperto ng onsen sa pamamagitan ng paglalakbay na kilala bilang "Beppu Hatto Onsen Michi." Bukod pa sa mga ito ay mayroon ring Beppu Argerich Music Festival, Beppu Art Month, at kapistahang pang-sining na gaganapin taon taon mula 2016 na tinatawag na "in BEPPU" kung saan itatampok ang sari-saring kultura at sining sa Beppu.

◎ Likhang-sining

Patuloy ang Beppu sa paglikha ng mga natatanging kagamitang yari sa kawayan tulad ng basket, at salaan. Kasama rin sa likha mula sa Beppu ang kushi (tradisyonal na kahon) at suklay na yari sa natatanging kahoy na mula sa Beppu. Bilang natatanging lugar ng likhang-sining mula sa kawayan na yari sa kamay, ang Beppu ay itinalagang isa sa lugar ng tradisyonal na sining ng bansang Hapon.